* අමාත්‍යාංශ මට්ටමින් සිදුකෙරෙන පරිපාලනමය ප්‍රමාදයන් හේතුවෙන් රාජ්‍ය ව්‍යවසාය ප්‍රතිසංස්කරණ ක්‍රියාවලියට අභියෝග එල්ල වී ඇති බවට තොරතුරු...
ශ්‍රී ලංකාවේ රාජ්‍ය ව්‍යවසාය ප්‍රතිසංස්කරණ ක්‍රියාවලිය හමුවේ පවතින ප්‍රධාන අභියෝගයක් වන්නේ, වසර ගණනාවකට පෙර ක්‍රියාකාරීත්වය නතර වී ගිය නමුදු පරිපාලනමය හේතූන් මත තවදුරටත් විසුරුවා හැර නොමැති අක්‍රීය රාජ්‍ය ආයතන සඳහා අඛණ්ඩව මහජන මුදල් වැය වීමයි. අන්තර්ජාතික මූල්‍ය අරමුදලේ (IMF) පුළුල් අරමුදල් පහසුකම (EFF) යටතේ ක්‍රියාත්මක වන ආර්ථික ප්‍රතිසංස්කරණ වැඩපිළිවෙළේ වත්මන් ප්‍රගතිය සමාලෝචනය කිරීමේදී මෙම තත්ත්වය විශේෂ අවධානයට ලක්ව තිබේ.
නිලධාරී තන්ත්‍රයේ මන්දගාමී ස්වභාවයක්....
ජාතික විගණන කාර්යාලය මඟින් මෑතකදී නිකුත් කරන ලද වාර්තාවකට අනුව, මීට මාස කිහිපයකට පෙර කැබිනට් මණ්ඩලය විසින් නිකුත් කරන ලද විශේෂ නියෝගයක් ක්‍රියාත්මක කිරීමේදී නිලධාරී තන්ත්‍රයේ මන්දගාමී ස්වභාවයක් පෙන්නුම් කර ඇත. 2025 සැප්තැම්බර් 03 වන දින නිකුත් කරන ලද අදාළ කැබිනට් නියෝගය මඟින් කර්මාන්ත හා ව්‍යවසායකත්ව සංවර්ධන අමාත්‍යාංශය වෙත නියෝග කර තිබුණේ අක්‍රීය වී ඇති රාජ්‍ය ආයතන සඳහා වහාම liquidators එනම් ඈවරකරුවන් පත් කරන ලෙසයි.
කෙසේ වෙතත්, ජාතික විගණන කාර්යාලයේ දත්තවලට අනුව, 2026 මැයි 31 වන විටත් එම නියෝගය ක්‍රියාත්මක කිරීමේ කිසිදු සැලකිය යුතු ප්‍රගතියක් අත්කරගෙන නොමැත. මේ යටතේ,
| ශ්‍රී ලංකා සිමෙන්ති සංස්ථාව,
| ලංකා සිමෙන්ති සමාගම,
| හිඟුරණ සීනි කර්මාන්ත සමාගම,
| කන්තලේ සීනි කර්මාන්ත ශාලාව,
| කුඩා හා මධ්‍ය පරිමාණ ව්‍යවසාය අධිකාරිය,
| දැව ආශ්‍රිත නිර්මාණ මධ්‍යස්ථානය,
| කහටගහ ඉංජිනේරු සේවා සහ
| ඇඹිලිපිටිය ලංකා ටෙක්ස්ටයිල් මිල්ස්
යන ආයතන අටක් මේ වන විටත් කිසිදු ක්‍රියාකාරීත්වයකින් තොරව පැවතීම විශේෂත්වයකි.
කන්තලේ සීනි කර්මාන්ත ශාලාව සහ අනෙකුත් ආයතනවල වත්මන් තත්ත්වය
මෙම අක්‍රීය ආයතන අතරින් වඩාත් කතාබහට ලක්ව ඇති ආයතනය වන්නේ කන්තලේ සීනි කර්මාන්ත ශාලාවයි. එහි කාර්මික නිෂ්පාදන කටයුතු 1994 වසරේදී, එනම් මීට දශක තුනකට පමණ පෙර සම්පූර්ණයෙන්ම නතර වී ගියද, ආයතනය තවදුරටත් පවත්වාගෙන යමින් එහි සේවකයින් 32 දෙනෙකු සඳහා වැටුප් හා දීමනා ගෙවීම රජය විසින් සිදු කරනු ලබයි. වාර්තා වන ආකාරයට මෙම සියලුම සේවකයින් වයස අවුරුදු 60 ඉක්ම වූ අයට අදාළ අනිවාර්ය විශ්‍රාම වයස් සීමාව පසු කළ අය වෙති.
විගණකාධිපති වාර්තාවට අනුව, කිසිදු නිෂ්පාදන ක්‍රියාවලියක් සිදු නොවූවත්, වැටුප්, දීමනා සහ පරිපාලන වියදම් සඳහා පමණක් කන්තලේ ආයතනය වෙනුවෙන් මසකට රුපියල් මිලියන 1.7 කට ආසන්න මුදක් වැය වේ. එය වාර්ෂිකව රුපියල් මිලියන 20.4 ක පමණ මුදලකි. මෙම ප්‍රමාදය හේතුවෙන් මූල්‍යමය පාඩුවට අමතරව එම ආයතනවල සතු ඉඩකඩම්, යන්ත්‍රෝපකරණ සහ අනෙකුත් භෞතික වත්කම් නිසි ප්‍රයෝජනයකට ගත නොහැකි අයුරින් අගුළු වැටී පැවතීමද තවත් ගැටළුවක් බව ආර්ථික විද්‍යාඥයෝ පෙන්වා දෙති.
මීට අමතරව, මූල්‍ය විනිවිදභාවය සහ වගවීම සම්බන්ධයෙන්ද ගැටලු මතු වී තිබේ. ලංකා සිමෙන්ති සමාගම සහ හිඟුරණ සීනි කර්මාන්ත සමාගම ඇතුළු ආයතන කිහිපයක් සිය ව්‍යවස්ථාපිත වාර්ෂික වාර්තා පාර්ලිමේන්තුවට ඉදිරිපත් කිරීම සම්බන්ධයෙන් විගණකාධිපතිවරයාට නිසි තොරතුරු ලබාදී නොමැති බව වාර්තා වේ. අමාත්‍යාංශය යටතේ පවතින ව්‍යවස්ථාපිත ආයතන ගණනාවක්ම නියමිත දින 180 වාර්තාකරණ කාලසීමාව තුළ සිය වාර්තා ඉදිරිපත් කිරීමට අපොහොසත් වී ඇති බවද දත්ත මඟින් අනාවරණය වේ.
ඉදිරි අභියෝග සහ ප්‍රතිසංස්කරණ අපේක්ෂා
ජාත්‍යන්තර මූල්‍ය අරමුදලේ වැඩපිළිවෙළ යටතේ ශ්‍රී ලංකාව සිදු කරන ආර්ථික ප්‍රතිසංස්කරණවල විශ්වසනීයත්වය තක්සේරු කිරීමේදී, රාජ්‍ය ආදායම් ඉලක්ක සහ මූල්‍ය පාලනයන්ට අමතරව, ආර්ථිකමය වශයෙන් කිසිදු ප්‍රයෝජනයක් නොමැති සහ අක්‍රීය වී ඇති ආයතන විධිමත්ව ඈවර කිරීම කෙරෙහිද අවධානය යොමු විය යුතුය.
රජය විසින් ප්‍රතිපත්තිමය වශයෙන් නිවැරදි තීරණ ගෙන, අදාළ විධිවිධාන පනවා තිබුණද, නිලධාරී තන්ත්‍රයේ පවතින පරිපාලනමය පැකිලීම් හේතුවෙන් එම තීරණ බිම් මට්ටමින් ක්‍රියාත්මක වීම ප්‍රමාද වී තිබේ. ඈවරකරුවන් පත් කිරීම, සේවක ගැටලු විසඳීම, වත්කම් බැහැර කිරීම සහ වගකීම් නිම කිරීම හරහා පමණක් රාජ්‍ය ව්‍යවසාය ප්‍රතිසංස්කරණවල සැබෑ අරමුණු සාක්ෂාත් කරගත හැකි වනු ඇතැයි විචාරකයෝ පෙන්වා දෙති.
මුලාශ්‍රය :
Lanka News | Government Keeps Paying For State Enterprises thst No Longer Exist
