'සමාජීය ප්‍රගතියකින් තොරව, ආර්ථික ප්‍රගතියක් ලබා ගත නොහැකියි'- ඇමති ජීවන්

'සමාජීය ප්‍රගතියකින් තොරව, ආර්ථික ප්‍රගතියක් ලබා ගත නොහැකියි,' අමාත්‍ය ජීවන් තොණ්ඩමන් පවසයි.  

බෙදීම් හමුවේ මානව ගරුත්වය සහ ඇතුළත්භාවය සුරක්ෂිත කරන සර්ව හා අනාගමික ප්‍රතිපත්තීන්වල පිහිටා කටයුතු කරන මෙන් ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් පුළුල් ලෙස ප්‍රශංසාවට ලක්වූ කතාවක් ඉදිරිපත් කරමින් සිය දේශපාලන සගයන්ගෙන් ආයාචනයක් කළේය.  

යුරෝපය සහ ආසියාව අතර “මිත්‍රත්වය සහ සංස්කෘතික හුවමාරුව ශක්තිමත් කිරීම” පිළිබඳව ෆ්‍රීඩික් නවුමන් පදනම (Friedrich Nauman Foundation) විසින් පැවැත්වූ වැඩසටහනක ප්‍රධාන ආරාධිත අමුත්තා ලෙස සහභාගී වෙමින් තොණ්ඩමන් අමාත්‍යවරයා, ප්‍රජාවන් අතර සංස්කෘතික හුවමාරුවේ ඇති වැදගත්කම සහ පුළුල් චින්තනය සහ අවබෝධය වැඩි කිරීම කෙරෙහි එහි ඇති බලපෑම පිළිබඳව සවිස්තරාත්මක පැහැදිලි කිරීමක් කළේය.  

“සංස්කෘතික හුවමාරුන් සිදුවන විට, ඔබ සහකම්පනය උපදවා ගැනීමට පෙළඹෙනවා, ඔබ තවත් ප්‍රජාවක අභිලාෂයන් තේරුම් ගැනීමට පෙළඹෙනවා.. ඔවුන්ගේ අරමුණු සහ අපහසුතා අවබෝධ වනවා. ඒ කිසිවක් නොමැතිව, ප්‍රගතියක් අත් වන්නේ නැහැ,” යනුවෙන් ඔහු පැවසීය.

සමරිසි (LGBTQ) ප්‍රජාව, වතු කම්කරුවන් සහ ශ්‍රී ලාංකීය සමාජයේ විවිධ ප්‍රජා කණ්ඩායම් ඇතුළු ශ්‍රී ලංකාවේ ආන්තික සහ කොන් කිරීමට ලක්වන ප්‍රජාවන් විවිධ අභියෝගවලට මුහුණ දෙන බව අමාත්‍යවරයා පිළිගත්තේය.

ප්‍රීතිමත් අභිමානයේ මාසයකට සුබපැතුම් එක්කරමින්, සමරිසි (LGBTQ) ප්‍රජාව මුහුණ දෙන වෙනස්කොට සැලකීම් පිළිබඳ සිය කණගාටුව ප්‍රකාශ කළ තොණ්ඩමන් අමාත්‍යවරයා, සම්මුතිගත සමරිසි සබඳතා නිර්සාපරාධීකරණය කිරීම සඳහා පාර්ලිමේන්තු මන්ත්‍රී ප්‍රේම්නාත් දොලවත්ත විසින් ඉදිරිපත් කළ පෞද්ගලික මන්ත්‍රී පනත් කෙටුම්පත පිළිබඳ සිය ප්‍රශංසාව පළ කළේය.

ශ්‍රී ලාංකීය කඳුකර දමිළ ජනතාවගේ ආගමනයේ 200 වන සංවත්සරය සිහිපත් කරමින් ඔවුන්ගේ “ගිවිසුම්ගත ශ්‍රම” (indentured labour) තත්ත්වය පිළිබඳ කතා කළ ඔහු, දශක ගණනාවක ප්‍රගතියක් අත්ව තිබුණ ද තම පුරවැසිභාවය සාධාරණ ලෙස භුක්ති විඳීමට එම ප්‍රජාවට තව බොහෝ දුර යා යුතුව ඇති බව අවධාරණය කළේය.