ක්‍රීඩකයින් හා නරඹන්නන් බියෙන් පලා යද්දී පාපන්දු පිටිය ලේ විලක් වෙයි: ප්‍රහාරකයන් සොයා පොලිස් මෙහෙයුම්
මෙක්සිකෝවේ පැවති ආධුනික පාපන්දු තරගයක් අතරතුර තුවක්කුකරුවන් සිදු කළ වෙඩි තැබීමකින් පුද්ගලයෙක් මිය ගොස් තවත් හය දෙනෙකුට තුවාල සිදුව තිබෙනවා.
ක්‍රීඩා පිටියේ ටච් රේඛාවට මෝටර් සයිකලයකින් පැමිණි ප්‍රහාරකයින් තරගය නැරඹීම සඳහා රැස්ව සිටි සෙනඟට වෙඩි වරුසාවක් එල්ල කළ බවත් බියට පත් ක්‍රීඩකයින් හා නරඹන්නන් වහාම එතැනින් පලා ගිය බවත් වාර්තා වනවා.
ඉරිදා සවස මේ වෙඩි ප්‍රහාරය සිදුව තිබෙන්නේ මෙක්සිකෝවේ ග්වනවාටෝ ප්‍රාන්තයේ සැන් ෆ්‍රැන්සිස්කෝ ඩෙල් රින්කොන් නගරයේ. මෙහිදී පුද්ගලයින් හත් දෙනෙකුට වෙඩි වැදී තිබෙන අතර හය දෙනෙක් තවමත් රෝහල්ගතව සිටින බව පැවසෙනවා. එක් පුද්ගලයෙක් පසුව රෝහලේදී මිය ගියා.
තරගය අහෝසි කෙරෙද්දී තුවාල ලැබූවන් ඔවුන්ගේ ඥාතීන් විසින් ඔසවාගෙන වාහනවලට දමා රෝහලට රැගෙන ගොස් තිබෙනවා. සිද්ධියෙන් මිය ගොස් ඇත්තේ 25 හැවිරිදි ආහාර වෙළෙන්දෙක්.
තුවක්කුකරුවන් පුද්ගලයින් දෙදෙනෙක් ඉලක්ක කරගෙන සිටි බවත් අනෙක් පුද්ගලයින් එතැනින් දිවයාම නිසා නොසිතූ ප්‍රමාණයක් අනතුරට ලක්වූ බවත් වෙඩි තැබීම සිදුවූ ස්ථානයේ සිටි නගර සභා සේවකයෙක් පවසා තිබෙනවා.
මිනිස් ඝාතන පරීක්ෂණයක් ආරම්භ කර ඇති ග්වනවාටෝ පොලිසිය තුවක්කරුවන් ලුහුබැඳ යමින් සිටිනවා.
තුවක්කුකරුවන් මීට පෙරත් මේ ප්‍රාන්තයේ පැවති ආධුනික තරගවලදී ප්‍රහාර සිදුකර තිබෙනවා. සලමංකා නගරයේ මේ වසරේ ජනවාරි 25 වැනිදා පැවති ආධුනික පාපන්දු තරගයකට එල්ල කළ සමූහ වෙඩිතැබීමකින් පුද්ගලයින් 11 දෙනෙකු මිය ගොස් තවත් පුද්ගලයින් 12 දෙනෙකුට තුවාල සිදුවුණා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
