කොරෝනා වලින් මියගෙන මුස්ලිම්වරුන්ගේ දේහයන් මන්නාරම දී භූමදාන කිරීමට අනුමැතිය 

කොරෝනා ආසාදනය වීමෙන් මියයන ශ්‍රී ලාංකික ඉස්ලාම් බැතිමතුන්ගේ අවසන් කටයුතු සම්බන්ධයෙන් පැනනැගී තිබු අර්බුදය නිම කරමින්, වසංගතයට ගොදුරුවී මියයන මුස්ලිම්වරුන් ගේ දේහයන් ලෝක සෞඛ්‍ය

සංවිධානයේ හා මෙරට විශේෂඥයින්ගේ නිර්දේශ මත භූමදාන කිරීමට කැබිනට් මණ්ඩලයේ අනුමැතිය ලැබී ඇත. 

 

ඒ අධිකරණ අමාත්‍ය අලි සබ්රි විසින් ඉදිරිපත් කර තිබු කැබිනට් පත්‍රීකාවක් සැලකිල්ලට ගනිමිනි.

 

ඒ අනුව මෙරට විශේෂඥයින් කණ්ඩායමකගේ නිර්දේශයන්ට අනුකුලව මන්නාරම ප්‍රදේශයේ තෝරාගනු ලැබූ භූමියක කොරෝනා ආසාදනය වී මියයන මුස්ලිම්වරුන්ගේ දේහයන් භූමදානය කිරීමට රජයේ අනුමැතිය ලැබී තිබේ.

 

ඉස්ලාම් භක්තිකයන්ගේ ආගමික පිලිවෙත නොතකා රජය විසින් මේ වන විට කොරෝනාබාධිතව මිය ගිය මුස්ලිම් ජාතිකයන් නම දෙනකුගේ සිරුරු පුළුස්සා ඇති බව නොවැම්බර් 3 අඟහරුවාදා පාර්ලිමේන්තුව හමුවේ අනාවරණය කළ 'සමගි ජන බලවේගයේ' පාර්ලිමේන්තු මන්ත්‍රී මුජිබර් රහුමාන්, ආගමානුකුල ලෙස අවසන් ගමන් යාමට ඔහුට මෙන්ම, අලි සබ්රි අමාත්‍යවරයාටද නොහැකිවීමේ අවදානම ගැන අනතුරු ඇඟවීය.

 

 

ශ්‍රී ලංකාව තුළ කොරෝනාවෛරසය ආසාදනය වී මරණයට පත් සංඛ්‍යාව ඉහළ යත් ම අවමංගල්‍ය කටයුතු සිදු කරන ආකාරය සම්බන්ධයෙන් සංවාදයක් මතුව තිබු අතර ඒ මීගමුවේදී මරණයට පත් දෙවෙනි රෝගියාගේ මෘත දේහය ඉස්ලාම් ආගමික චාරිත්‍රවලින් බැහැරව ආදාහනය කිරීමට පියවර ගැනීමත් සමගය.

 

ඒ අනුව, කොරෝනා රෝගයෙන් මියයන මුස්ලිම් ජාතිකයන්ගේ දේහයන් භුමදානය කළ හැකි ආකාරය පිළිබදව සොයා බලා, විද්‍යාත්මක නිර්දේශ ඉක්මනින් ඉදිරිපත් කිරීමට විශේෂඥයන්ගෙන් සමන්විත කමිටුවක් පත් කිරීමට පසුගිය අප්‍රේල් 02 ද පැවති පක්ෂ නායක රැස්වීමේදී අග්‍රාමාත්‍ය මහින්ද ‍රාජපක්ෂ එකග වී තිබිණ. 

 

කෙසේවුවද, මුස්ලිම් ජනතාවගේ හැඟීම් අවබෝධකරගෙන මුස්ලිම් මෘතදේහ භූමදාන කිරීමට අවසර ලබාදුන් ජනාධිපති ගෝඨාභය රාජපක්ෂ ඇතුළු රජය වෙත අනන්ත අප්‍රමාණ ස්තුතිය පලකරන බව සිලෝන් තවුහිද් ජාමාත් සංවිධානය නිවේදනයක් නිකුත්කරමින් කියා සිටියි.